05 - فك الموت
قفز **توني** من الماي وهبط فوق **هانتر**. "شو اللي بتسويه؟ اتركني وانقذ نفسك!"
جنود فابلا الحين بيطلقون نار على طول والقذائف قاعده ترش الماي حوالينهم.
"اشتغل معاي والا نموت سوا. ماراح اتركك!"
فجأه **هانتر** حس كأن فيه قطعة حديد حمرا بتدور خلال وتر رجله وبتقطعه. وعرف ان هذي اول رصاصة اي كي. **توني** دار و مسك معدات الغطاس باحكام على ظهر **هانتر** قبل لا يستخدم زخم حركته وينزلق فوق **هانتر** اول شي برجوله بينما هو قاعد يسحب بجنب. يحاول يحرر **هانتر** من قدام السلك الشائك. **هانتر** استوعب شنو **توني** قاعد يحاول يسوي و سحب سچينته و قام يقص على الاماكن اللي السلك الشائك فيها ماسك، قاعد يساعد **توني** عشان يحرره.
فجأه، صار حر و اختفوا تحت الماي بينما **توني** ماسك **هانتر** من ورا بذراعه و يسحبه لتحت. بعدهم يسمعون صوت القناصين والرصاصات اللي لحسن الحظ فاتتهم يمين و يسار. بعدين انفجار ضخم لما قنبله يدويه انفجرت جنبهم بالضبط والموجات الصدميه خلتهم يطيرون. **توني** بعده ماسك **هانتر** بقوه و هم قاعدين يتمرچحون و يتدهورون.
وبعدين، **هانتر** اغمى عليه.
~*~*~
**هانتر** بدأ يستعيد وعيه شوي شوي و تعرّف على صورة **توني** و القمر كامل وراه. هو على حافة النهر و استوعب ان **توني** توه مخلّص تمريضه. بعده يسمع صفارات الانذار وهي تصيح من بعيد لما جلس و لاحظ ان **توني** خيط الجرح.
"اه، انت معاي مره ثانيه، **هانتر**. صدمة القنبله اليدويه طيّرتك بالكامل و جبتك هنا على الضفة. فقدت دم وايد."
"سويناها؟"
"زملائنا نجحوا. كان فيه خمس انفجارات. لذلك، خلنا نأمل انه فيه ضرر كافي."
"**توني**، لازم تروح الحين. انا راح ابقى على قيد الحياة..."
"لاتكون مچنون، **هانتر**. انا آخذك للبيت!"
"**توني**، عندك بيت و عايله قاعدين ينطرونك. فكر في صورة **كليا** و **زوي** بحضنها. انت اب الحين. كم من الوقت ضيّعنا؟ لازم توصل لمكان التجمع مثل ما اتفقنا. انت تعرف القاعده. ما فيه ناطرة لاحد. وبعدين لازم تسبح سبعة كيلو و تمشي عشرين كيلو لنقطة التقاط پوما. روح، الوقت قاعد يخلص. انا راح اخذ الطريق الاقصر، على الرغم من انه اخطر، و اتوجه لنقطة التقاط الطوارئ."
"شلون بتسويها، **هانتر**؟ يمكن تقدر توصل بطريقك في النهر اذا كنت محظوظ، بس ماراح توصل لهذي النقطه برجلك المجروحة و الدم القليل اللي بعروقك."
"راح اسويها مثل ما سويتها قبل. العريف **توني** **ايستوود**، انت الحين تتجاهل امر مباشر! بس اتركني و التحق بالباقين!"
"لاتحاول تستعرض رتبتك علي، يالرائد. ما فيه وقت للكلام الفارغ. خلني اساعدك تدخل النهر. يا اننا نعيش او نموت هنا سوا. ماراح اتركك!"
~*~*~
**توني** اول واحد طلع على سطح الماي و قام يراقب الضفاف و السماء عشان اي علامة من العدو. اشار لـ **هانتر** انه آمن و **هانتر** بعد طلع و شال القطعه اللي يحطونها بالفم. الليله اللي طافت سبحوا مع التيار بأسرع ما سمحت حالة **هانتر** لهم. كان عندهم ميزة الظلام عشان يقدرون يسبحون على السطح بدون ما يستخدمون الاكسجين الثمين.
العدو ارسلوا قوات مع التيار و نشروا جنود على طول ضفاف النهر بينما القوارب و الهليكوبترات قاعده تتقاطع في النهر و تدور عليهم. مع شروق الشمس، صار اخطر و لهذا السبب ما استخدموا الاكسجين. خطة نجاتهم الوحيده هي ان يسبحون على طول الجانب العميق من النهر و ينزلون تحت الماي لما لازم. واجهوا وضع خطير لما وحدة من فابلا شافتهم في منعطف ضيق و ضحل في النهر و فتحوا النار. **توني** رد باطلاق النار بمسدسه و لما الجنود ركضوا عشان يختبون، كانوا محظوظين انهم لاقوا جزء عميق و نزلوا. بعدين طلعوا بس اضطروا ينزلون تحت مره ثانيه لان الهليكوبترات و القوارب و القوات انتشرت في كل مكان.
اضطروا يبقون تحت الماي لفترة طويلة و مع قرب الغسق و نفاد الاكسجين تقريبا، الحين قاموا يطلعون على السطح. تقريبا وصلوا للمكان اللي لازم يطلعون من النهر و يتحركون برّاً لنقطة الالتقاط اللي لازم ينطرون فيها البوما. هذا اخطر جزء في هروبهم. الوقت قاعد يخلص و **هانتر** شاك اذا بيوصلون للمكان في الوقت المناسب للپوما عشان تلتقطهم مع الغسق. اذا ما نجحوا في هالمساء، لازم يبقون على قيد الحياة ليوم غد المساء عشان فرصه ثانيه.
**توني** يحسب موقعهم الدقيق لما **هانتر** انضم له على السطح و هو يخبر **هانتر**: "حنا هنا، **هانتر**. بس هناك حول الزاوية."
فجأه شي مسك رجل **هانتر** الغير مجروحة و يحاول يسحبه لتحت. **توني** اختفى من نظر **هانتر** و هو بس يشوف ماي اسود بينما يحس كأن فيه مسامير حاده و قصيره قاعده تخترق فخذه. **هانتر** حط القطعه اللي بالفم و نظر بدهشه لمصدر الهجوم. انخطف قلبه لما شاف التمساح العملاق اللي ياكل لحوم البشر ماسكه بفكه. سحب سچينته و بدأ يطعن الوحش بس كان غير فعال مثل لما تطعن صخره. قعد يطعن بهستيريه على امل يوصل لعين. و هو يعرف شنو راح يصير بعد. الوحش راح يدور و مع هذا، راح يمزق رجله. التماسيح تمزق قطع من اللحم او الاطراف بالدوران.
وبعدين فجأه **هانتر** شاف **توني** فوق التمساح، يهاجم الوحش بوحشيه بسچينته. التمساح فجأه فتح فكه و دار بعيد عنهم. اختفى بنفس السريه اللي جاء فيها. ركضوا مسرعين للسطح و شالوا القطع اللي بالفم. "كم مره راح تنقذ مؤخرتي خلال هذي العمليه، **توني**؟"
"تعال، لازم نطلع للبر باسرع ما يمكن لاني ما احتاج مشاجره ثانيه. لاتسألني ليش خلانا نهرب، لان كل شي طعنته حسيت انه مطاط صلب."
~*~*~
الشمس قاعده تغرب لما عشرة جنود ينظرون بقلق للپوما اللي هبطت في فورت فوت. المسعفين يجون يركضون بالنقاله و يشوفون شلون **توني** يركض بجنب و هو يطالع قائدهم المحبوب. الجنود كلهم انضموا بالركض بينما المسعفين يشقون طريقهم للاسعاف الميداني.
الرائد **هانتر** شكله ضعيف بس واعي تماما و هو يطالع لفوق عشان يشوف اذا كلهم موجودين. فوق صوت الپوما يصيح: "يبدو انكم كلكم موجودين. ما فيه احد ذاق حبة رصاص؟"
العريف **جيرالد** يصيح بصوت عالي و هو يبتسم بفرح: "لا يارائد، مثل العاده تركنا الشرف لك عشان تبلع هالحبه الصغيرة. كنا نعرف انك راح تسويها، مثل العاده!"
**هانتر** هز راسه بعدم موافقه و اشر بابهامه لـ **توني**. "المره هذي الطاقم انقذ مؤخرتي مرات عديده. انقذني من السلك الشائك و البنادق موجهه علي؛ انقذني من الغرق بعد قنبله يدويه خلتني اشوف النجوم؛ انقذني من الهليكوبترات، القوارب، و جيش كامل من الجنود على ضفاف النهر. بس هذا مو كل شي! بصراحه، حتى انقذ مؤخرتي من فك وحش تمساح! وبعدين حملني لأميال عشان اكون في الوقت المناسب للپوما! والحين راح يعطيني دمه الثمين! بس لاتحاتون. راح اقولكم كل شي بعدين. بس امل اني ماراح ورث عناده بعد. يا رجالي الطيبين؛ ارتاحوا عدل قبل مهمتنا الجايه!"
الجنود وقفوا بانتباه و شاهدوا بصمت رائدهم المحبوب و العريف الاول **توني** و هم يصعدون بالاسعاف قبل لا يركض بعيد.